May Handum Ka Nga Mag-Artista sa Ilonggo nga Pelikula?

Si Peter Solis Nery may una nga panawagan sa mga maluyagon mag-artista sa iya Ilonggo nga pelikula "ANG GUGMA SA PANAHON SANG BAKUNAWA".

Ini nga pelikula iya nga buot suguran nga himuon sa Iloilo kag Guimaras sa ulihi nga semana sang Pebrero tubtub sa tunga-tunga sang Marso 2012. Nagapangita siya sang magadala sang papel ni Mateo, isa ka 28 años nga musikero nga naghigugma kag napaslawan.

Kinahanglan nakahibalo mag-Hiligaynon, simpatico ang hitsura [daw mahuluy-on nga anghel, indi daw “rapist”], kag niwangon.

Singer si Mateo gani pasulabihon gid kon maayo magkanta ang aplikante, kag kinahanglan kabalo man sia magkuting-kuting sang gitara, o magmwestra nga nagagitara, apang kon indi gid kabalo magkanta, sige lang kay may mga trick man kita sina.

Mga kanta ni Josh Groban ang tipo nga ginakanta ni Mateo, kag kon makanta niya nga daw Josh Groban ang “Dandansoy” kag “Ay! Ay! Kalisud,” sia na ang ginapangita naton!

Si Mateo ang pinakabida sini nga pelikula gani madamu sia sang linya nga salauluhon, apang indi magkahadlok ang aplikante tungod tagaan sia sang maayo nga workshop kag paghanas sang direktor antes ang shooting.

Entertinahon man ang mga aplikante nga nagapang-edaron sang 23 tubtub 36 años basta kon tan-awon, malapit sa edad 28.

Kinahanglan pa guid sang teenager nga Mateo [13-16 years old, pwede makaaudition ang bataon tan-awon nga 21], dapat kabalo man syempre magkanta. maayo gid nga may kakanggid sa mapilian mga 28 year old Mateo, apang ang pinakadako gid nga kinaanggid nila amo ang ila pamanit, o kolor sang panit. indi pwede nga pution ang adult kag Negrito ang teenager, kadamu nga papaya whitening soap ang kinahanglan nga magaeksplikar sina!

Ipaagi lang sa Facebook account ni “Peter Solis Nery“  ang pagpahibalo sang inyo interes para masuguran naton ang pag-estoryahanay sang talent fee kag kontrata.

Madamu gid nga salamat!