Malip-ot Nga Painu-ino Ni Edgar Siscar

Si Edgar Siscar, akon abyan sa Facebook, ilabi na gid sa PAHINA' HILIGAYNON sa nasambit nga Facebook.

Sining ulihi lang may gin-paambit sya nga painuino nahanungod sa pagtulon-an kun paanu mangin maayo kag mapasanyog ang isa ka abilidad sa pagsulat.

Ang masunod kuha sa iya sinulat sa PAHINA' HILIGAYNON:

"ISA man sang pagtulon-an sa maayo nga pagsulat amo ang pagbasa sg madamo nga sinulatan kag balasahon. Ang mga hangkilan nga mga manunulat lunsay mga palabasa nga mga tinuga. Sa matuod lang, gikan sa aton nabasa nga mga sinulatan sang iban makasulat pa gid kita sang kapin nga matahom nga mga sigulanon. Ini, sanglit ang aton kaisipan nagatipon sang kaugalingon nga ideya kag alam para sa kaugalingon nga katin-aran. Ang baliskad sini matuod man--- indi kita makasulat sing maayo kon diutay lang ang aton nabasahan sanglit diutay lang ang aton nahibal-an nga pwede naton masulat, magluwas sa aton mga nakit-an sa aton palibot ukon natabo sa aton pangabuhi. Kon sayuron, ang pagbasa kag pagsulat lunsay naga-agbayanay nga bulohaton sa patag sang pangabuhi sang hamtong nga manunulat."
Kun isa-isahon naton tul-iron sadtong pagtulon-an, may apat kita nga makuha nga leksyon:

1. Ang hankilan nga mga manunulat palabasa
2. Nagatin-ad ang kaisipan kun magbasa
3. Naga-agbayanay ang pagbasa kag pagsulat
4. Ang pagbasa buluhaton sg hamtong nga manunulat

Madamu nga salamat, abyan Edgar Siscar, sa mapuslanon mo nga painuino.

laragway (picture): nagikan sa Facebook account ni Edgar Siscar