Bulawan sa Punta Sang Balangaw

Laragway gikan sa kbarrus.wikispaces.com

ni Edith B. Colmo

Bisan ano nga dalimoos sang panahon, may masanag nga nagahulat katulad sang bulawan sa punta sang balangaw.

17 anyos si Deding, second year college. Maalam pero indi palahambal kag wala nagabarkada kay ang handom nga makatapos sa iya pagtuon. Siya ang kamagulangan sa lima ka mag-utod. Pirme sia ang nagapanguna sa ila klase.

 Sa wala ginalaumi, isa ka tinuga ang nagpukaw sang mahamook nga nagakatulogon niya nga balatyagon. Kon halos pa lang, indi sia magsapak sa mga lalaki. Ugaling masupog si Arjay. Wala sia mag-untat sing sunod-sunod tubtob nahangdo ang ginatan-ay nga gugma.

Daw mansanas nga nagapanghamot si Deding. Bisan mailom diutay ang pamaniton, pero ang mga mata huloy, kag nagabawod ang amimilok.

Labi nga naga-magnet sang balatyagon ni Arjay, amo ang malolo nga tingog kag simple nga pagkatao ni Deding.

Indi katulad sang mga kababaenhan sini nga henerasyon nga puno sang butingting ang kalawasan kag madamo sing bisyo. Si Deding, indi makita nga nagalagaw sa mall kay balaynon ang iya ugali.

Sadto, wala gid sing isaway ang iya ginikanan sa iya. Apang nagbaliskad ang tanan sang matukiban nga nagamabdos sia sing apat ka bulan. Nagawawaw ang iloy sa konsomisyon kay daku ang iya paglaom nga manginkatuwang sa ila pangabuhi kon makatapos sa pagtuon si Deding. May nagahulat sa iya nga trabaho sa luwas sang pungsod kay ang iya tiya amo ang magapatigayon sang tanan, basta taposon lang ang pagtuon. Maayo lang kay igo natukiban sing iya ginikanan nga nagamabdos sia, natapos na ang ila final exams. Sa kainit sang iya ginikanan, gintrangkahan sia sa kwarto kag wala ginata-gaan sing pagkaon. Sang ulihi, ginpilit sia nga pa-imnon sang mga tableta para mahulog ang iya ginamabdos kay indi sila gusto sa pagapamanahon ni Deding kay wala man sing palangitan-an bangod naga-eskwela pa lang.

Pero indi gusto si Deding nga hulogon ang bata sa iya tago-angkan. Ginpapili sia sang iya ginikanan, ipahulog ang bata ukon may malain nga matabo sa iya nobyo. Wala magsabat si Deding kay indi sia gusto madula sa iya kabuhi ang duha ka tinuga. Nagdesis-yon ang iya ginikanan nga dalhon sia sa paltera para ipahulog ang bata. Apang bago matabo ang tanan, nagpangayo sia sing bulig sa iya classmate bangod sa iya kahimtanan. Wala sia sing dangpan kay indi makapalapit si Arjay sa ila basi may matabo pa kon iya pakadtoon. Gilayon nagpatigayon ang iya classmate nga makapangayo sing bulig sa polis. Gilayon nagsabat ang utoridad natungod sa iya ang problema. Ila ginkadtoan sa poloy-an si Deding. Nagahana gid nga malakat sila sa paltera kag amo man ang pag-abot sang mga polis. Gintago sa kwarto pero wala sing mahimo ang iya ginikanan, kay nagsing-git sia sing tabang, gani labi nga nagbaskog ang rason sang polis nga bitbiton si Deding. Nagwaldas ang iya iloy, pero wala sing mahimo. Gindala sila tanan sa police station, para ma-record ang tanan. Ginlaygayan sang polis ang ginikanan ni Deding, tuhoy sa kinamatarong sang bata nga mabuhi kag ang salabton nila sa laye kon dayonon ang ila plano nga hulogon. Hoyhoy ang abaga sang iloy ni Deding, dala ang kainit. Pero wala sia sing mahimo.

Bisan balabag sa totonlan, napilitan sila magpasugot nga mapakasal sanday Deding kag Arjay.

Si Arjay ginbuligan sing iya tiya nga makapundar sing diutay nga negosyo sa internet cafe nga santo gid sa iya korso, samtang ginpadayon ang pagtuon.

Si Deding naman ginahulat lang nga makabun-ag sang ginamabdos kay pataposon sia sa pagtuon para makalakat sa gwa para magtrabaho.

Ginkasugtanan nila nga ibilin ang bata sa iya ginikanan kon makalakat sia kag pa-apason si Arjay. Sa subong, makasaplid gid man ang ila negosyo. May bolobaligya sia nga kalan-on para sa naga-internet.

Naglipas ang mabaskog nga unos sa kabuhi ni Deding. Karon, nagbulos ang dopoy-dopoy sang hangin nga nagapa-ayon sa panahon.

Ginapanan-aw ni Deding nga may masanag nga buasdamlag ang ila pangabuhi ni Arjay. May bulawan gid sa punta sang balangaw nga nagahulat sa ila.*

Negros Daily Bulletin: Bahin sa Hiligaynon Edith B. Colmo